යුනෙස්කෝ අධ්‍යක්ෂ ජනරාල් ඔඩ්රි අසූලේ මහත්මිය ශ්‍රී ලංකාවට පමණක් නොව ලෝක ඉතිහාසය පිළිබඳ වටිනා තොරතුරු අඩංගු මහාවංශ පුස්කොළ සංරක්ෂණය කිරීම පිළිබඳව පේරාදෙණිය විශ්වවිද්‍යාලයට කෘතඥතාව පළ කළේය. මහාවංශය ලෝක උරුම ලේඛනයක් ලෙස නිල වශයෙන් පිළිගෙන ලෝක උරුම සහතිකය ප්‍රදානය කිරීමේ උත්සවයක් ඊයේ (17) විශ්වවිද්‍යාලයේදී පැවැති අවස්ථාවේදී අසූලේ මහත්මිය මේ බව අවධාරණය කළේය.
යුනෙස්කෝ ලෝක උරුම ස්ථාන අටකට නිවහන වන ශ්‍රී ලංකාව පසුගිය වසර 75 තුළ යුනෙස්කෝව සමඟ ශක්තිමත් සබඳතාවක් පවත්වා ගෙන ගිය බව අසූලේ මහත්මිය සඳහන් කළේය. ලොව පුරා ඓතිහාසික වශයෙන් වැදගත් සංස්කෘතික මූලාශ්‍ර ආරක්ෂා කිරීමට යුනෙස්කෝවේ කැපවීම ද ඇය අවධාරණය කළ අතර ශ්‍රී ලංකාවෙන් සොයාගත් අනුවාද කිහිපයකින් මහාවංශයේ අව්‍යාජ ඓතිහාසික ග්‍රන්ථය හඳුනා ගැනීමට උපකාර කළ අයට ප්‍රශංසා කළාය.
මෙහිදී අදහස් දැක්වූ පේරාදෙණිය විශ්වවිද්‍යාලයේ ඉතිහාස අංශයේ අංශ ප්‍රධාන මහාචාර්ය රෝහිත දිසානායක මහතා, මහාවංශය පුස්කොළ පත්‍ර 238කින් සමන්විත වන අතර ශ්‍රී ලංකාවේ නොබිඳුණු ඉතිහාසය කිසිදු වෙනස් කිරීමකින් තොරව විස්තර කරන බව පැහැදිලි කළේය. ක්‍රිස්තු පූර්ව 6 වැනි සියවසේ සිට 1815 දක්වා වූ ඓතිහාසික සිදුවීම්වල පුළුල් පරාසයක් ආවරණය වන බැවින් අත්පිටපත තනිකරම එක් ජාතියක හෝ ආගමක ඉතිහාසය ලෙස වටහා නොගත යුතු බව ඔහු පැහැදිලි කළේය.
මෙම අවස්ථාවට සම්භාවනීය අමුත්තන් රැසක් සහභාගි වූ අතර, පේරාදෙණිය විශ්වවිද්‍යාලයේ කුලපති මහාචාර්ය ජී.එච්. පීරිස්, උපකුලපති මහාචාර්ය එම්.ඩී. ලමවංශ, ප්‍රධාන පුස්තකාලයාධිපති රාසයියා මහේෂ්වරන්, විවිධ විද්වතුන් සහ යුනෙස්කෝ සහ ජාතික පුස්තකාල සේවා මණ්ඩලයේ නියෝජිතයින් ද එක්ව සිටියහ. උත්සවයෙන් අනතුරුව ශ්‍රී දළදා මාලිගාව වෙත ගිය අසූලේ මහත්මිය එහිදී වැඳ පුදාගෙන ආශිර්වාද ලබා ගත්තාය.