ඉදිරි ජනාධිපතිවරණයේදී රනිල් වික්‍රමසිංහ මහතාට සහය දීමට ශ්‍රී ලංකා නිදහස් පක්ෂය තීරණය කළේ පක්ෂයට වඩා රට ගැන සිතා බව ශ්‍රී ලංකා නිදහස් පක්ෂයේ වැඩබලන සභාපති, අමාත්‍ය නිමල් සිරිපාල ද සිල්වා මහතා පැවසීය. මෙම තීරණය ගැනීමේදී තමන් පැය හතරකට වැඩි කාලයක් පක්ෂයේ සියලු කණ්ඩායම් සමඟ සාකච්ඡා කළ බවත් පක්ෂයේ අනන්‍යතාව රැක ගනිමින් ජනාධිපතිවරයාට සහාය පළ කිරීමට සියලු දෙනා එකඟතාවකට පැමිණි බවත් අමාත්‍යවරයා සඳහන් කළේය.
පක්ෂයේ විද්වත් කමිටුවක් විසින් සකස් කරන ලද යෝජනා මාලාවක් ද ජනාධිපති රනිල් වික්‍රමසිංහ මහතා වෙත ඉදිරිපත් කළ බවත් තම ප්‍රතිපත්ති ප්‍රකාශය සකස් කිරීමේදී ඒ පිළිබඳව දැඩි අවධානයක් යොමු කරන බව ජනාධිපතිවරයා සඳහන් කළ බවත් අමාත්‍යවරයා වැඩිදුරටත් පැවසීය.
අමාත්‍ය නිමල් සිරිපාල ද සිල්වා මාධ්‍ය වෙත කියා සිටියේ ජනාධිපතිවරයාට සහය දැක්වීම සඳහා පක්ෂයේ දේශපාලන මණ්ඩලය, විධායක සභාව සහ දිස්ත්‍රික් සංවිධායකවරුන් ඒකමතිකව එකඟතාවකට පැමිණ ඇති බවයි.
“පසුගිය ජනාධිපතිවරණයේදී ශ්‍රී ලංකා නිදහස් පක්ෂය ඡන්ද ලක්ෂ 17ක් ලබා ගත් අතර එය හිටපු ජනාධිපති ගෝඨාභය රාජපක්ෂ මහතාගේ ජයග්‍රහණයට තීරණාත්මක සාධකයක් වුණා. මෙවර මැතිවරණයේදීත් ශ්‍රීලනිප ඡන්ද තීරණාත්මක සාධකයක් වෙනවා.”
