හිටපු අධිකරණ, බන්ධනාගාර කටයුතු සහ ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ මහතා ඉදිරි ජනාධිපතිවරණයට තරඟ කිරීම සඳහා ඊයේ (1) පෙරවරුවේ රාජගිරියේ පිහිටි මැතිවරණ මහ ලේකම් කාර්යාලයේදී ඇප මුදල් තැන්පත් කළේය.
ජාතික ප්‍රජාතන්ත්‍රවාදී පෙරමුණේ ජනාධිපති අපේක්ෂකයා ලෙස පාර්ලිමේන්තු මන්ත්‍රී විජයදාස රාජපක්ෂ මහතා ඉදිරිපත් වීමට නියමිතයි. පසුගිය සතියේ විජයදාස රාජපක්ෂ ජනාධිපතිවරණ අපේක්ෂකත්වය නිල වශයෙන් ප්‍රකාශ කරමින් සිටියදී අධිකරණ, බන්ධනාගාර කටයුතු සහ ව්‍යවස්ථා ප්‍රතිසංස්කරණ යන අමාත්‍ය ධුරවලින් ඉල්ලා අස්විය.
2024 ජනාධිපතිවරණය සඳහා විජයදාස රාජපක්ෂ මහතා සමඟ ඊයේ (1) වන විට අපේක්ෂකයින් දස දෙනෙකු ඇප මුදල් තැන්පත් කර ඇත. ජනාධිපතිවරණය සඳහා ඇප මුදල් තැන්පත් කර ඇති අපේක්ෂකයින් දස දෙනා වන්නේ ස්වාධීන අපේක්ෂකයෙකු ලෙස ජනාධිපති රනිල් වික්‍රමසිංහ, ස්වාධීන අපේක්ෂකයෙකු ලෙස හිටපු පාර්ලිමේන්තු මන්ත්‍රී සරත් කීර්තිරත්න, අභිනව නිවහල් පෙරමුණෙන් ඕෂල හේරත්, ඒ.එස්.පී. ලියනගේ ශ්‍රී ලංකා කම්කරු පක්ෂයෙන්, පාර්ලිමේන්තු මන්ත්‍රී සජිත් ප්‍රේමදාස සමගි ජන බලවේගයෙන්, පී.ඩබ්ලිව්.එස්.කේ. බණ්ඩාරනායක ජාතික සංවර්ධන පෙරමුණෙන් සහ පාර්ලිමේන්තු මන්ත්‍රී විජයදාස රාජපක්ෂ ජාතික ප්‍රජාතන්ත්‍රවාදී පෙරමුණෙන්.
ස්වාධීන අපේක්ෂකයෙකු ලෙස කේ.කේ පියදාස, එක්සත් සමාජවාදී පක්ෂයෙන් සිරිතුංග ජයසූරිය සහ රුහුණු ජනතා පෙරමුණෙන් අජන්තා ද සොයිසා ඊයේ ඇප මුදල් තැන්පත් කළා.