“Sri Lankan Summer Nights” සංගීත ප්‍රසංගයේදී සිකුරාදා (2) අත්අඩංගුවට ගත් ගායක ගායිකාවන් ඇතුළු ශ්‍රී ලාංකිකයන් 24 දෙනෙකු නිදහස් කර ගැනීමට හැකි වූ බව කුවේට්හි ශ්‍රී ලංකා තානාපති කාර්යාලය නිවේදනය කරයි.
කුවේට් බලධාරීන්ගේ නිසි අවසරයකින් තොරව මෙම ප්‍රසංගය පවත්වා ඇති අතර, ශ්‍රී ලාංකිකයන් 26 දෙනෙකු කුවේට් පොලිසිය විසින් අත්අඩංගුවට ගෙන ඇති බව තානාපති කාර්යාලය පවසයි.
අත්අඩංගුවට ගත් පිරිස අතර ශ්‍රී ලංකාවේ සිට කුවේටයට ගොස් ප්‍රසංගයට සහභාගි වූ උත්සව සංවිධායකයින් සහ කලාකරුවන් ද සිටින බව තානාපති කාර්යාලය සඳහන් කළේය.
අත්අඩංගුවට ගැනීමෙන් පසු තානාපති කාර්යාල නිලධාරීන් කුවේට් පොලිසියෙන් ඉල්ලා සිටියේ ඊට සම්බන්ධ ශ්‍රී ලාංකිකයන්ට සමාව දෙන ලෙසයි. මේ හේතුවෙන් රැඳවියන් 26 දෙනාගෙන් 24 දෙනෙකු ඊයේ (3දා) නිදහස් කර ඇති බව තානාපති කාර්යාලය තහවුරු කළේය.
කෙසේ වෙතත්, තානාපති කාර්යාලය සඳහන් කළේ, උත්සවයේ සංවිධායකයින් දෙදෙනෙකු කුවේට් පොලිස් අත්අඩංගුවේ සිටින අතර ඔවුන් මේ වන විට විමර්ශනය කරමින් සිටින බවයි.
“Sri Lankan Summer Nights” සංගීත ප්‍රසංගය සංවිධානය කළේ “Ethera Api” සංවිධානයේ කුවේට් ශාඛාව විසිනි.