හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා විසින් ගොනු කර තිබූ ඇප අයදුම්පත්‍රයේ නියෝගය ලබන සැප්තැම්බර් 04 වැනිදාට අභියාචනාධිකරණය අද කල් තැබුවා.
තමාට එරෙහි නඩුව අවසන් වනතුරු රිමාන්ඩ් භාරයේ තැබීමට මාලිගාකන්ද මහේස්ත්‍රාත් අධිකරණය ලබාදුන් නියෝගය අත්හිටුවීමේ නියෝගයක් නිකුත් කරන ලෙසයි හිටපු අමාත්‍යවරයා අධිකරණයෙන් ඉල්ලා සිටියේ.
රන්බුක්වැල්ල ගොනු කර ඇති පෙත්සම ඉදිරියට ගෙන යාමට අවසර දෙනවාද යන්න සහ ඇප ලබා දෙනවාද නැද්ද යන්න පිළිබඳ තීරණය සැප්තැම්බර් මාසයේදී ප්‍රකාශයට පත් කරන බව අභියාචනාධිකරණ විනිසුරු මඩුල්ල වැඩිදුරටත් ප්‍රකාශ කළේය.
හිටපු සෞඛ්‍ය අමාත්‍ය කෙහෙළිය රඹුක්වැල්ල ප්‍රමිතියෙන් තොර Immune Globulin එන්නත් ආනයනය කළ බවට චෝදනා එල්ල වී මේ වන විට රක්ෂිත බන්ධනාගාර ගත කර සිටිනවා.
රජයේ ජ්‍යෙෂ්ඨ නිලධාරීන් දෙදෙනාගේ සහය ඇතිව ව්‍යාජ ලේඛන සකස් කර ඖෂධ සමාගමක් විසින් ප්‍රමිතියෙන් තොර Immune Globulin එන්නත් කුප්පි 22,500ක් ආනයනය කර ඇති බවට එල්ල වූ චෝදනා සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කිරීමෙන් අනතුරුව කෙහෙළිය රඹුක්වැල්ල ඇතුළු සෞඛ්‍ය අමාත්‍යාංශයේ නිලධාරීන් කිහිප දෙනෙකු අත්අඩංගුවට ගෙන රක්ෂිත බන්ධනාගාර ගත කෙරුණා.
රුපියල් කෝටි 100ක මූල්‍ය වංචාවක් සිදුව ඇති බව විමර්ශනවලදී අනාවරණය විය. කෙහෙළිය රඹුක්වැල්ල සෞඛ්‍ය අමාත්‍යවරයා ලෙස කටයුතු කළ සමයේ එම ප්‍රමිතියෙන් තොර ඖෂධ ආනයනය කිරීමෙන් රුපියල් මිලියන 130ක් සිදුව තිබේ. (පුවත්පත්)