ඉදිරි ජනාධිපතිවරණය සඳහා නාමයෝජනා භාරගැනීම වෙනුවෙන් ජාතික මැතිවරණ කොමිෂන් සභාව සිය කාර්යාලයට සහ ඒ අවට ප්‍රදේශවලට විශේෂ ආරක්ෂාවක් ක්‍රියාත්මක කිරීමට තීරණය කර තිබේ.
ලංකාදීප පුවත්පතට අනුව බදාදා (අගෝස්තු 15) විශේෂ ආරක්ෂක විධිවිධාන ක්‍රියාත්මක කරන බව මැතිවරණ කොමිසමේ සභාපති ආර්.එම්.ඒ.එල්.රත්නායක මහතා පැවසීය.
ඒ සඳහා පොලිසිය, පොලිස් විශේෂ කාර්ය බළකාය (STF) ඇතුළු නීතිය ක්‍රියාත්මක කරන බලධාරීන් 1500ක් යොදවන බවද හෙතෙම වැඩිදුරටත් පැවැසීය.
මේ අතර, නාමයෝජනා ක්‍රියාවලිය සඳහා මැතිවරණ කොමිෂන් සභාවට පැමිණෙන වාහන සඳහා බදාදා විශේෂ සැලැස්මක් ක්‍රියාත්මක කිරීමට ශ්‍රී ලංකා පොලිසිය අපේක්ෂා කරයි.
මැතිවරණ කොමිෂන් සභාවට පැමිණීමට අපේක්ෂකයාට පමණක් භාවිත කළ හැකි A, B, C ලෙස සටහන් කර ඇති වාහන බලපත්‍ර තුනක් ජනාධිපති අපේක්ෂකයින් සඳහා නිකුත් කිරීමට පොලිසිය අපේක්ෂා කරයි.
ජනාධිපති අපේක්ෂකයා සමඟින් නාමයෝජනා අත්සන් කරන තවත් පුද්ගලයන් දෙදෙනෙකුට පමණක් බදාදා මැතිවරණ කොමිසමට පැමිණීමට අවසර ලබා දෙනු ඇත.
වාහන තදබදයට හසුවී නියමිත වේලාවට මැතිවරණ කොමිසමට වාර්තා කිරීමට අපහසු ජනාධිපති අපේක්ෂකයින් රැගෙන ඒම සඳහා පොලිස් යතුරුපැදි යෙදවීමටද විශේෂ වැඩපිළිවෙළක් සකස් කරන බවද වාර්තා වේ.
ජනාධිපති අපේක්ෂකයන්ගේ ආධාරකරුවන් නාමයෝජනා භාරදීම සඳහා පැමිණෙන විට ඔවුන් සඳහා මැතිවරණ කොමිෂන් සභාව අවට වෙනම ස්ථාන වෙන් කිරීමට ද කටයුතු යොදා ඇත.
මැතිවරණ කොමිෂන් සභාවේ නිලධාරීන්, මහජන ආරක්ෂක අමාත්‍යාංශයේ ලේකම් සහ ශ්‍රී ලංකා පොලිසියේ සහ ගුවන් හමුදාවේ නිලධාරීන් අතර පසුගියදා පැවති සාකච්ඡාවකින් අනතුරුව අවශ්‍ය ආරක්ෂක විධිවිධාන තීරණය කර ඇත. (පුවත්පත්)