ජාතික ප්‍රජාතන්ත්‍රවාදී පෙරමුණේ ජනාධිපති අපේක්ෂක විජයදාස රාජපක්ෂ මහතා අද පෙරවරුවේ නාමයෝජනා පත්‍ර භාරදීමේ ක්‍රියාවලියේදී මැතිවරණ කොමිසමේ විනය පවත්වා ගැනීමට අපොහොසත් වීම සම්බන්ධයෙන් විවේචන එල්ල කළේය.
“මීට පෙර, මැතිවරණ කොමිෂන් සභාව උසාවියකට සමාන විනයක්, බැරෑරුම් ලෙස හා ගෞරවයෙන් යුතුව පවත්වාගෙන ගියේය. නමුත් මෙවර එය විවිධ කල්ලි ගොඩනැගුණු ගමේ කෝපි කඩේට සමාන විය.” රාජපක්ෂ පැවසීය.
රටේ පළමු පුරවැසියා වීමට අපේක්ෂාවෙන් සිටි පිරිසගේ හැසිරීම කණගාටුදායක බව හිටපු අමාත්‍යවරයා මැතිවරණ කොමිසමේ නිලධාරීන්ට නාමයෝජනා පත්‍ර භාරදීමෙන් අනතුරුව මාධ්‍ය වෙත අදහස් දක්වමින් කියා සිටියේය.
“ඩමි අපේක්ෂකයෝ හිටියා, තනිකරම එක අපේක්ෂකයෙක් ප්‍රවර්ධනය කරන්න,” රාජපක්ෂ චෝදනා කළේය. “එක අපේක්ෂකයෙකුට එහෙම අය 15ක් 20ක් වත් හිටියා. ඔවුන් කල්ලිවල මැරයන් ලෙස හැසිරුණා,” ඔහු පැවසීය.
අපේක්ෂකයින් අතර විනය ආරක්ෂා කරන ලෙස රාජපක්ෂ මැතිවරණ කොමිසමෙන් ඉල්ලා සිටියේය. “විනය රකින ලෙස අපි ජනතාවගෙන් ඉල්ලා සිටීමට පෙර, අපි ආදර්ශයට ගත යුතුයි,” ඔහු කියා සිටියේ එය කොමිසමේ වගකීමක් බවයි.
ශ්‍රී ලංකා නිදහස් පක්ෂයේ ජනාධිපති අපේක්ෂකයා රාජපක්ෂ බව මේ වසර මුලදී ප්‍රකාශ කළ ශ්‍රීලනිප කන්ඩායමේ නායක මෛත්‍රීපාල සිරිසේන සමඟ ද හිටපු අධිකරණ ඇමතිවරයා මතභේදයට තුඩු දී ඇති බවක් පෙනෙන්නට තිබුණි.
සිරිසේන සමගි ජන බලවේගයට එක්වන බවට පළවන වාර්තා පිළිබඳව රාජපක්ෂ දන්නේ දැයි විමසූ විට එය සාධනීය වර්ධනයක් වනු ඇති බව රාජපක්ෂ මහතා පැවසීය.
“මට හිතෙනවා එයා එහෙම ගියොත් හොඳයි කියලා” රාජපක්ෂ කීවේය. (පුවත්පත්)