අගෝස්තු 08 වැනි දින ශ්‍රීපුර ප්‍රදේශයෙන් වාර්තා වූ වෙඩි තැබීමේ සිද්ධියට ආධාර සැපයූ සැකකරුවන් 6 දෙනෙකු අත්අඩංගුවට ගෙන ඇති අතර, එය ඩුබායි හි වෙසෙන පාතාල නායකයකුගේ අණක් මත සිදු කර ඇති බවට විමර්ශනවලදී අනාවරණය වී තිබේ.
පොලිසිය පැවසුවේ ගැමුණුපුර ප්‍රදේශයේ පිල්ලයාර් හන්දිය අසලදී යතුරුපැදියකින් පැමිණි තුවක්කුකරුවන් දෙදෙනෙකු වෙඩි තබා ඝාතනය කර ප්‍රදේශයෙන් පළා ගොස් ඇති බවයි.
වෙඩි තැබීම සම්බන්ධයෙන් ශ්‍රීපුර පොලිසිය පරීක්ෂණ ආරම්භ කර තිබූ අතර සැකකරුවන් 6 දෙනෙකු ඊයේ අත්අඩංගුවට ගෙන තිබුණා.
සැකකරුවන් අවුරුදු 20ත් 47ත් අතර වයස්වල පසුවන වැලිඔය, පදවිය, කැබිතිගොල්ලෑව සහ පරාක්‍රමපුර ප්‍රදේශවල පදිංචිකරුවන්.
පෞද්ගලික ආරවුලක් මත පාතාල නායක කංකානම්ගේ ප්‍රියන්ත ගුණසීර් හෙවත් පාතල ප්‍රියන්ත විසින් මෙම වෙඩි තැබීම සිදුකර ඇති බවට සැකකරුවන්ගෙන් සිදුකළ ප්‍රශ්න කිරීම්වලදී අනාවරණය වී තිබේ.
සිද්ධියෙන් ඝාතනයට ලක්වූ පුද්ගලයා අපේක්ෂිත ඉලක්කය නොවන බවත්, එය වෙනත් පුද්ගලයෙකු බවත් වැඩිදුරටත් අනාවරණය වූ බව පොලිසිය පවසයි. ශ්‍රීපුර පොලිසිය වැඩිදුර පරීක්ෂණ පවත්වයි. (පුවත්පත්)