හෙරොයින් කිලෝග්‍රෑම් 01.53ක් සන්තකයේ තබාගෙන සිටි පොලිස් පරීක්ෂකවරයෙකු සහ කොස්තාපල්වරයෙකු පිළියන්දල ප්‍රදේශයේදී කොළඹ අපරාධ කොට්ඨාශය (CCD) විසින් අත්අඩංගුවට ගෙන තිබේ.
පිළියන්දල ප්‍රදේශයේ සුපිරි වෙළෙඳ මධ්‍යස්ථානයක රථ ගාලකදී පොලිස් නිලධාරීන් දෙදෙනා අත්අඩංගුවට ගත් බව පොලිසිය පවසයි.
මෙම පොලිස් නිලධාරීන් දෙදෙනා මත්ද්‍රව්‍ය ජාවාරමේ අරමුණින් සුඛෝපභෝගී වාහනයකින් පැමිණ ඇති බව විමර්ශනවලදී අනාවරණය වී ඇත.
අත්අඩංගුවට ගත් පොලිස් නිලධාරීන් දෙදෙනා මොරටුව පොලිස් විශේෂ කාර්ය බලකා (STF) කඳවුරේ බුද්ධි අංශයට අනුයුක්තව සේවය කරති.
35 හැවිරිදි පොලිස් පරීක්ෂකවරයා මත්ද්‍රව්‍ය ජාවාරමට සහාය වීම සම්බන්ධයෙන් අත්අඩංගුවට ගෙන ඇති අතර 32 හැවිරිදි පොලිස් කොස්තාපල්වරයා මත්ද්‍රව්‍ය ළඟ තබා ගැනීමේ චෝදනාව මත අත්අඩංගුවට ගෙන ඇත. (පුවත්පත්)