බත්තරමුල්ල ආගමන විගමන දෙපාර්තුමේන්තුව ඉදිරිපිට පසුගිය දින කිහිපය තුළ විදේශ ගමන් බලපත්‍ර ලබාගැනීමට උත්සාහ කරන පුද්ගලයන් සමඟ දිගු පෝලිම් දක්නට ලැබුණි.
ඇතැම් පිරිස් දින ගණනාවක් පෝලිම්වල රැඳී සිටින බවත් ඇතැමුන් ආහාර හෝ වැසිකිළි පහසුකම් නොමැතිව පාස්පෝට් කාර්යාලය ඉදිරිපිට රාත්‍රියේ රැඳී සිටින බවත් මහජනතාව ප්‍රකාශ කරති.
අයදුම්කරුවන් සඳහා නිසි ක්‍රමවේදයක් ක්‍රියාත්මක කිරීමට විදේශ ගමන් බලපත්‍ර කාර්යාලය අපොහොසත් වී ඇති බවත්, එමගින් මහජනතාව දැඩි අපහසුතාවයට පත්ව ඇති බවත් ඔවුහු වැඩිදුරටත් චෝදනා කළහ.
ආගමන හා විගමන දෙපාර්තමේන්තුව එහි අන්තර්ජාල ගමන් බලපත්‍ර ක්‍රමය පසුගියදා අහෝසි කිරීමෙන් පසුව මෙම අවුල් සහගත තත්ත්වය ඇති විය.
ඒ වෙනුවට විදේශ ගමන් බලපත්‍ර ලබාදෙන්නේ පළමුවෙන් පැමිණිය යුතු ක්‍රමයට බවයි එම දෙපාර්තමේන්තුව නිවේදනය කළේ.
එමෙන්ම හිස් විදේශ ගමන් බලපත්‍ර පොත් හිඟයකටද දෙපාර්තමේන්තුව මුහුණ දී සිටින අතර, ඒ හේතුවෙන් සීමිත ගමන් බලපත්‍ර නිකුත් කිරීමට කටයුතු කරන බව ද දෙපාර්තමේන්තුව නිවේදනය කර ඇත. (පුවත්පත්)