පාර්ලිමේන්තු මන්ත්‍රීවරුන්ට වාහන බලපත්‍ර නිකුත් කිරීම සම්බන්ධයෙන් ජනාධිපති රනිල් වික්‍රමසිංහ මහතා සමඟ කළ සංවාදයක සමාජ මාධ්‍යවල පැතිර යන වීඩියෝවකට සමගි ජන බලවේගය (SJB) පාර්ලිමේන්තු මන්ත්‍රී S.M.Marikkar ප්‍රතිචාර දක්වා තිබේ.
මරික්කාර් මන්ත්‍රීවරයා එම වීඩියෝව සම්බන්ධයෙන් මාධ්‍ය වෙත ප්‍රකාශ කළේ අවමංගල්‍ය උත්සවයකදී සහ මහජනතාව ඉදිරියේ මෙම සංවාදය සිදුව ඇති නමුත් එය පටිගත කර ඇත්තේ ජනාධිපතිවරයා විසින් බවයි.
“මාස කිහිපයකට පෙර පිළියන්දල අවමංගල්‍ය උත්සවයකදී මට ජනාධිපතිතුමා හමුවුණා. ජනාධිපතිතුමාම මට කතා බහකට ආරාධනා කළා. ඒ අවස්ථාවේදී ජනාධිපතිතුමා පාර්ලිමේන්තු මන්ත්‍රීවරුන්ට වාහන බලපත්‍ර ලබාදීම සම්බන්ධයෙන් මගේ මතය විමසා සිටියා. මම කිව්වා මුදල් ඇමැතිවරයා විදියට එතුමාට බලය තියෙනවා යෝජනාවට අත්සන් කරන්න, ඉදිරියට ගිහින් තමන්ට අවශ්‍ය දේ කරන්න.” ඔහු කීවේ සංවාදයේ තොරතුරු හෙළි කරමිනි.
මරික්කාර් මන්ත්‍රීවරයා වැඩිදුරටත් කියා සිටියේ සිද්ධිය වී මාස කිහිපයකට පසු එම සංවාදයේ හඬපටය ජනාධිපතිවරයා විසින් මීට දින කිහිපයකට පෙර නිකුත් කළ බවයි.
එම අවස්ථාවේ සංවාදය පටිගත කළ බව ජනාධිපතිවරයා තමාට දන්වා සිටි බව ප්‍රකාශ කළ මරික්කාර් මන්ත්‍රීවරයා ප්‍රකාශ කළේ සංවාදය ප්‍රසිද්ධියේ සිදු වූවක් බැවින් තමාට කරදරයක් නොමැති බවයි.
රාජපක්ෂලාගේ සහය ඇතිව පිහිටවූ ආණ්ඩුව යටතේ ජනාධිපතිවරයා විසින් ඇමති ධුරයක් ලබා දීම මීට පෙර තමන් විසින් ප්‍රතික්ෂේප කළ බවත්, එම කණ්ඩායමට එක්වීමේ අදහසක් තමාට නොමැති බවත් මරික්කාර් මන්ත්‍රීවරයා පෙන්වා දුන්නේය. (පුවත්පත්)