දිස්ත්‍රික්ක තුනක අක්කර 100,000ක රබර් වගාව ව්‍යාප්ත කිරීමට සැලසුම් කර ඇත

ශ්‍රී ලංකාවේ වාර්ෂික ස්වභාවික රබර් නිෂ්පාදනය සියයට 60 කින් ඉහළ නැංවීමේ අරමුණින් ඉදිරි වසර කිහිපය තුළ රබර් වගා කිරීමේ ප්‍රධාන සැලැස්මක් ක්‍රියාත්මක කිරීමට කෘෂිකර්ම හා වැවිලි කර්මාන්ත අමාත්‍යාංශය පියවර ගෙන ඇත.
මේ හේතුව නිසා වියළි කලාපයට අයත් මොනරාගල, අම්පාර, බදුල්ල වැනි ප්‍රදේශවල අක්කර ලක්ෂයක රබර් වගාව ආරම්භ කිරීමට සැලසුම් කර ඇති බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා සඳහන් කළේය.
අමාත්‍යවරයා මේ බව සඳහන් කළේ ඊයේ (31) පෙරවරුවේ තාක්ෂණික වශයෙන් නිශ්චිත රබර් (TSR) නිෂ්පාදනයේ යෙදී සිටින නිෂ්පාදකයින් සමඟ පැවති සාකච්ඡාවකදීය. දැනට TSR සතුව රබර් ආශ්‍රිත නිෂ්පාදන කම්හල් 10ක් රට තුළ ඇත. ඔවුන් තම නිෂ්පාදන සඳහා භාවිතා කරන TSR රබර් සඳහා රබර් කිරි කැපීමේදී ඉවතලන ගස් ලේස් (ඔට්ටපාළු) භාවිතා වේ.
නමුත් මේ වන විට තම නිෂ්පාදන ධාරිතාවයෙන් සියයට 30ක් පමණ ප්‍රයෝජනයට ගන්නා බවත්, ගස් ලේස් නොමැතිකම ඊට බලපා ඇති බවත් කර්මාන්තකරුවෝ පැවසූහ.
මෙම සාකච්ඡාවේදී අදහස් දැක්වූ අමාත්‍යවරයා මොනරාගල ඇතුළු දිස්ත්‍රික්ක තුනක රබර් වගාව අක්කර ලක්ෂයක් ව්‍යාප්ත කිරීම සඳහා ප්‍රධාන සැලැස්මක් සකස් කර ඇති බවත් එය ක්‍රියාත්මක කිරීම ආරම්භ කරන ලෙස රබර් සංවර්ධන දෙපාර්තමේන්තුවට උපදෙස් ලබාදුන් බවත් පැවසීය.
රබර් කිරි වැඩි ප්‍රමාණයක් නිපදවිය හැකි රබර් ප්‍රභේද නිෂ්පාදනය සඳහා නව ක්ලෝන හඳුනාගැනීමේ පර්යේෂණ කඩිනම් කරන ලෙසද ඔහු රබර් පර්යේෂණ ආයතනයට උපදෙස් දුන්නේය.
TSR රබර් ආශ්‍රිත නිෂ්පාදන නිපදවන කර්මාන්තශාලා සඳහා ප්‍රමාණවත් තරම් ගස් ලේස් නොමැති නිසා ගස් ලේස් වෙනුවට කප් ලම්ප් ආනයනය කිරීමට කැබිනට් මණ්ඩලය තීරණය කළ බව ද ඔහු සඳහන් කළේය.
දැනට අපේ රටේ TSR සඳහා මෙට්‍රික් ටොන් 60,240ක ඉල්ලුමක් පවතින නමුත් මෙරට නිෂ්පාදනය වන්නේ මෙට්‍රික් ටොන් 17,225ක් පමණි. මේ හේතුව නිසා ගෘහස්ථ ගස් ලේස් කර්මාන්තය ආරක්ෂා කර ගනිමින් TSR ආනයනය සඳහා තාවකාලිකව අනුමැතිය ලබා දී ඇති බව අමාත්‍යවරයා අවධාරණය කළේය.
මින් ඉදිරියට කළුතර දිස්ත්‍රික්කයේ ඉඩම්වල රබර් වගාව අනුමත නොකිරීමට තීරණය කළ බවද අමාත්‍යවරයා පැවසීය. එයට හේතුව රබර් වගාවට වඩා ඉහළ ආදායමක් ලබාගැනීමට කළුතර දිස්ත්‍රික්කයේ ඉඩම්වල ගම්මිරිස් වැනි කුළුබඩු වගා කිරීම මෙන්ම කුළුබඩු වගාව සඳහා ඉහළ හැකියාවක් පවතින බව තහවුරු වී ඇති බැවිනි.
මෙම සාකච්ඡාවට රබර් පර්යේෂණ ආයතනයේ සභාපති සරත් චන්ද්‍රසිරි මහතා ඇතුළු අමාත්‍යාංශයේ නිලධාරීන් මෙන්ම TSR ආශ්‍රිත කර්මාන්තකරුවන්ද සහභාගි වූහ.